I.N.D.M.M. Kada banyak nang tahunya pang bahwa masarakat Kalimantan Barat tu baisi mushap Alkurannya saurang karana mushap ini dasar kada dicitak sacara masal. Mushap ini dikaluarakan ulih Pamarintah Parupinsi Kalimantan Barat limbah ditashih ulih Lajnah Pentashih Mushaf Al Qur’an Departemen Agama Republik Indonesia pada tanggal 31 Disimbir 2002 M/26 Sawal 1423 H.
Panulisannya dimulai sacara rasmi ulih Gubarnur Kalimantan Barat wayah itu, H. Aspar Aswin, pada bulan Juni 2001 wan dinyataakan tuntung digawi pada bulan Uktubir 2002. Dalam panggawiannya, Pamarintah Parupinsi Kalimantan Barat malibatakan sapuluh urang pangaligarapi, yaitu 6 urang panulis parupisiunal tumatan Bandung wan 4 panulis lukal.
Mushap Kalimantan Barat ini baisi 604 halaman Alkuran ditambah sakitar 30 halaman tambahan nang ditulis mamakai kayu pakis handam diatas kartas Conqueror Laid 300 gram Brilliant White (Inggaris) nang baukuran 70 x 100 cm lawan tinta India Ink DR. PHILLIP MARTIN, Black Star ‘MATE’ (AS) wan India Ink WINSOR & NEWTON Water Resistant (Inggaris). Gaya hurupnya yaitu gaya naskhi (gasan naskah) wan gaya tsuluts (gasan ngaran surah).
Paulahan iluminasi (hiasan) bingkai halaman Alkuran mamakai ragam hias has Kalimantan Barat sabanyak 30 macam maliputi 10 Kabupatin dan kumpilasi ragam hias itnik gasan halaman: Sampul, Judul, Ummul, Nishful, wan Khatmul Qur’an sarta Halaman Piagam. Alat-alat nang dipakai barupa tinta Acrilic WINSOR & NEWTON (Liquid & Paste), kuas GOLD SCEPTRE (Winsor & Newton), wan amas murni (Real Gold Taiwan) jua amas Artificial (Singapura & Japang). Hiasan-hiasan ini digawi ulih saniman wan disainir tumatan ITB, STISI, wan ISI Yugya jua 3 urang saniman lukal.
Di bawah ini adalah rincian pamalihan ragam hias wilayah budaya wan jus:
- Kutamadia Puntianak (Jus 1, 11, wan 21);
- Kabupatin Puntianak (Jus 2, 12, wan 22);
- Kabupatin Katapang (Jus 3, 13, wan 23);
- Kabupatin Sambas (Jus 4, 14, wan 24);
- Kabupatin Landak (Jus 5, 15, wan 25);
- Kabupatin Sanggau (Jus 6, 16, wan 26);
- Kabupatin Sintang (Jus 7, 17, wan 27);
- Kabupatin Kapuas Hulu (Jus 8, 18, wan 28);
- Kabupatin Bangkayang (Jus 9, 19, wan 29);
- Kabupatin Singkawang (Jus 10, 20, wan 30).
Mushap ini panulis tukar wayah Musabaqah Tilawatil Quran tingkat Parupinsi nang diadaakan di Kuta Singkawang pada bulan Mei 2008 saharga Rp 250.000,-.
Lamun ada nang handak malihat, ulun ni ayu haja.
.L.
Tidak ada komentar:
Posting Komentar